KАНДИДАТУРИТЕ НА АРИФИ И БЕЈТА СИГУРЕН ЗНАK ЗА ВЛАДИНО ПРОВЕТРУВАЊЕ

Реконструкција ќе има, рокади на ресори неизвесни

Човечки е да се повлечам од функцијата. Без оглед дали ќе добијам или изгубам на изборите, не се враќам на министерската функција бидејќи ги почитувам демократијата и волјата на граѓаните. Сметам дека ова ќе биде и партиски став, вели министерот за локална самоуправа Невзат Бејта

Номинациите за градоначалници на вицепремиерката за евроинтеграции Теута Арифи и на министерот за локална самоуправа, Невзат Бејта неминовно ќе значат реконструкција на Владата на Никола Груевски, но не и трампа на ресори меѓу ВМРО-ДПМНЕ и ДУИ, вели висок функционер од партијата на Али Ахмети.

С` уште нема партиска одлука дали Арифи и Бејта ќе се повлечат од функциите по официјализирањето на кандидатурите, а лидерот Ахмети с` уште ги крие и новите партиски адути за двете министерства. Според функционерот, владините партнери Груевски и Ахмети не разговарале за реконструкција и за евентуална промена на некои од ресорите, но не се исклучува токму тоа да биде тема на средбата, која може да се одржи неделава.

Од партијата на Груевски вчера не успеавме да добиеме став.

- Ресорите ќе ги задржиме и не верувам дека скоро ќе има трампа на министерства. Во актуелниот мандат имаме важни ресори и тешко дека ќе има размена оти распределбата на министерствата е договорена при формирањето на Владата, а евентуални рокади ќе повлечат пакет измени во пониските ешалони - вели функционерот на ДУИ.

Во партијата одбиваат да ги коментираат шпекулациите дека во евроинтеграциската фотелја на Арифи можно е да седнат пратеничката Ермира Мехмети-Деваја или шефот на кабинетот на Ахмети, Артан Груби.

Двајцата кандидати за градоначалници немаат законска обврска да се повлечат од министерските функции, но, според експертите, од етичка гледна точка таквата одлука би била пожелна. Иако технички гледано Арифи ќе може да ја врши функцијата во Владата, прашање е колку ќе има политичка тежина.

Вчера не можевме да добиеме став од вицепремиерката, иако токму Секретаријатот за евроинтеграции е специфичен не само поради важноста и тежината на евроинтеграциските процеси за земјава, туку и поради тоа што Арифи нема заменик кој активно би продолжил да раководи со ресорот. Од кабинетот на Секретаријатот ни одговоријa дека Арифи не сака да коментира додека одлуката за кандидатурата не помине и на Централниот одбор на партијата, закажан за утре.

- Човечки е да се повлечам од функцијата. Без оглед дали ќе добијам или изгубам на изборите, не се враќам на министерската функција, бидејќи ги почитувам демократијата и волјата на граѓаните. Сметам дека ова ќе биде и партиски став - ни изјави министерот за локална самоуправа Невзат Бејта.

Со ова тој потврди дека прашање на време е реконструкцијата на кабинетот на Груевски.

Од друга страна, номинациите на министрите и партиските потпретседатели Арифи и Бејта, во јавноста се толкува како стравување на ДУИ втор пат да не ги загуби Тетово и Гостивар, ако се знае дека на минатите избори партијата на Ахмети не успеа да победи во градовите во Полошко. Номинациите од централно на локално ниво се деградација, особено за Арифи, која Брисел ќе треба да го замени со Тетово.

Наспроти ова, функционерот на ДУИ вели дека не станува збор за девалвирање.

- За ДУИ еднакво битни се процесите на евроинтеграција и на децентрализација - вели функционерот.

Kалкулациите дали ДУИ за Тетово ќе настапи со Арифи, Ахмети ги правеше повеќе од половина година. Дознаваме дека одлуката паднала по консултациите на најтесното партиско раководство. Во ДУИ велат дека не случајно токму за Тетово и за Гостивар ДУИ на изборите оди со првиот ешалон. Бејта повторно ја добил партиската доверба да се кандидира за Гостивар по пресметките дека на изборите во 2011 година Руфи Османи како носител на листа изгубил во Гостивар.

Мариела ТраЈковска