Вардар по грешка на тапет кај ФИФА поради Адо

Ганецот Даниел Адо одамна си замина од Вардар, а „црвено-црните“ уште ја плаќаат грешката со ангажирањето на помпезно најавуваното засилување, што не одигра ниту една минута за клубот. Двете страни имаа спор што стаса до ФИФА, бидејќи Адо побаруваше од скопјани околу 10 илјади евра.

Во меѓувреме, недоразбирањата беа надминати со меѓусебна спогодба и Адо потпишал документ, во кој стои дека клубот не му должи ништо, но заборавил да ја информира светската куќа на фудбалот.

Од ФИФА продолжиле да го третираат случајот и донеле одлука „црвено-црните“ да му ги исплатат парите на црномурниот играч во рок од 30 дена.

Правниот галиматијас ќе го чини Вардар дополнителни 500 швајцарски франци за да се обжали одлуката на ФИФА, а адут ќе биде документот со потпис на Адо. Ганецот беше голема фудбалска инвестиција на поранешниот претседател Борче Ристевски, а требаше да го плаќа неговиот лут противник Слободан Вујчиќ.

Вчера попладне, фудбалерот на Победа Душан Савиќ потпиша двегодишен договор со Вардар, а денеска ќе се појави на тренинг со новите соиграчи. „Црвено-црните“ го очекуваа и Гоце Толески како засилување во врвот на нападот. Со нив, Вардар ќе биде помоќен во офанзивата, дел од играта каде скопјани беа „тенки“. За место на позициите најблиску до противничкиот гол досега тренерот Драги Канатларовски можеше да смета на Бурхан Емрулаху, Христијан Кировски, Јован Костовски и Филип Петров. Петров, кој е син на некогашниот напаѓач на Вардар, Тетекс, Хајдук и шпански Бургос, Мирко Петров, деновиве треба да потпише професионален договор со матичниот клуб. Филип е еден од најталентираните играч од младинскиот погон, заедно со Оливер Пеев, Костовски, Музафер Ејупи и Филип Спасески.

(З.П.)