Продолжениот викенд го наполни Охрид
Прв пат, оваа летна сезона, вчера во Охрид се почувствува вистински туристички метеж. Продолжениот празничен викенд, Охридскиот пиво-фест и големиот број забавни манифестации што се организираат деновиве привлекоа голем број посетители во нашиот најголем туристички центар. Туристите во организирани групи и индивидуално почнаа да пристигнуваат во Охрид вчера, уште од раните утрински часови, а уште поголем број се очекува да пристигнат денеска и утре.
Полни кафулиња, сообраќаен метеж и начичкани плажи беше она што оваа туристичка сезона му фалеше на Охрид. Охридските туристички работници, угостители и приватни станоиздавачи тријат раце и се надеваат дека продолжениот празничен викенд ќе донесе задоволителна заработка.
- Гостите се претежно млади, а тоа се должи на забавите што се организираат. Речиси сите ги сместуваме со претходна резервација. Според метеоролошките најави, наредните 15-ина дена ќе бидат сончеви и стабилни. Очекуваме дека посетеноста на Охрид ќе се приближи на претходните летни сезони, кога градот беше преполн со туристи - велат приватните станоиздавачи.
Покрај продолжениот празничен викенд, за зголемена посетеност на градот ќе придонесе и Охридскиот пиво-фест, кој годинава се одржува прв пат. Пивската треска, по долги најавувања, вчера и официјално ги раздрма охриѓани и нивните гости, а Охрид им се придружи на градовите што го слават пивото.
Првиот дел од програма на Пиво-фестот почна вчера, на стадионот „Билјанини Извори“, а ќе трае до 1 август. Организаторот „Герила маркет“ покрај тоа што обезбеди бесплатен влез за посетителите, обезбеди и посебни шанкови и штандови, а посетителите ќе имаат можност да пробаат приближно 50 домашни и странски пива, по специјални цени, како и различни видови храна. (Е.Е.) |
EUR 61.50
AUD 42.50
USD 46.83
GBP 73,63
