Отворен почесен унгарски конзулат во Битола

Во присуство на унгарскиот претседател на Собранието, Ласло Kовер, денеска во Битола беше отворен почесен унгарски конзулат. Целта на новоотвореното конзуларно претставништво е продлабочување на економската, образовната и културната соработка меѓу двете земји.

- Унгарија со симпатии гледа на судбините на народите од Балканот. Денес еден од најважните стратегиски определби на нашата надворешна политика е да ги поддржуваме евро-атлантските аспирации на народите од Балканот. Во последниот период од владеењето на Османлиите, Австро-унгарската монархија имаше свој конзулат во Битола. Меѓу двете светски војни самостојната Унгарија имаше отворено 20 конзулати на Балканот. Со ова фактички се продолжуваат тие традиции - изјави Kовер.

Тој стави акцент на образовната соработка потенцирајќи дека универзитетите во Унгарија со широко отворени врати ги очекуваат македонските студенти. За почесен унгарски конзул во Битола е назначен бизнисменот Сашо Јанакиевски. Битолскиот градоначалник Владимир Талески изрази надеж дека конзулатот ќе помогне во привлекување унгарски инвестиции во Битола.

- Kога бев назначаен за градоначалник, Битола имаше само четири конзулати, денес овој е тринаесетти. Продолжуваме со враќањето на традицијата на конзулска Битола - изјави Талески. (Ж.З.)