Делата на последниот гемиЏиЈа промовирани во Битола

Шатев бил и нашиот прв историограф

Првите два тома од историографски ракописи на Павел Шатев, книгите „Историја на Македонија“ и „Биографија на Борис Сарафов“, вчера беа промовирани во Битола, 69 години по смртта на македонскиот револуционерен деец и гемиџија Павел Шатев (1882-1951). Во превод на публицистот Предраг Димитровски и во редакција на Зоран Тодоровски, директор на Државниот архив на Македонија, книгите содржат дел од 30-те ракописи што Милка Шатева, ќерката на починатиот гемиџија, му ги предала на Димитровски.

До крајот на годината се очекува да бидат објавени осум книги од ракописите на Шатев. Во првиот објавен том е опфатен периодот на македонската држава од древноста до денес.

Вториот том фрла поинаква светлина врз ликот на револуционерот Борис Сарафов.

- Во македонските историски трудови Сарафов е претставен како офицер на бугарската армија и врховист. Ракописите за него Шатев ги напишал додека бил во затворот во Ќустендил, во 1944 година. Го вброил меѓу најзначајните револуционерни личности во развојот на македонското национално движење, заедно со Даме Груев, Гоце Делчев и Ѓорче Петров. Напишал дека на моменти имало несогласувања меѓу нив, но тие не се должеле на идејни, туку на карактерни разлики - изјави Тодоровски.

Според историчарите, Шатев, по обемноста и тежината на ракописите што ги оставил, може да се нарече прв македонски историограф.

- Разочарана бев што македонската историографија во првите научни обиди по војната била лишена од трудовите на овој македонски интелектуалец и мислител. Жално е секогаш историјата да ја почнуваме од почеток - изјави историчарката Виолета Ачковска.

(Ж.З.)