Блогерството во „Културен живот“
Списанието за култура, уметност и за општествени прашања „Културен живот“ му го посвети своето последно издание на блогерството.Под заглавјето „Комуникациите и новите медиуми. Моќта на блоговите“, се објавени текстови на комуникологот Сеад Џигал. Сузана Милевска пишува за блогосферата како стражар на визуелната култура. Археологот Василка Димитровска објавила текст за блог-археологијата и за нејзината веродостојност. Јана Ивановска истражувала на тема како блоговите влијаат на јавното мнение. Калина Малеска-Гегај се осврнува на делата „Островот од претходниот ден“ на Умберто Еко, „Таинствениот двојник“ на Џозеф Конрад и „Големата вода“ на Живко Чинго, наоѓајќи нивна заедничка нишка - водата како извор на двојна наративна линија. Во списанието е и текстот на Еко, „Постилите“, за својот роман „Името на розата“. Иван Џепароски објавил есеј на тема „Литературата и возвишеното“, а Лидија Димкова посветила текст на Оливера Николова, која ја нарекува „книжевна мајка“. За делата на Виктор Вазарели, осврт прави Марика Бочварова-Плавевска. Во рубриката „Излог на книги“, се објавени рецензии за „Книга за Рацин“ од Гане Тодоровски и за „Контексти“ од Анастасија Ѓурчинова. Кирил Пенушлиски објавил текст посветен на творештвото на австрискиот режисер Фриц Ланг, режисерот на антологискиот „Метрополис“ од 1927 година. За љубителите на драмското писмо, објавена е драмата „Разгрнување“ од Жанина Мирчевска.
|
EUR 61.50
AUD 42.50
USD 46.83
GBP 73,63
