Претставување на македонското културно наследство во Уругвај

„Културно наследство на Република Македонија“ е темата на која Панче Велков денеска ќе одржи предавање во градското собрание на уругвајската метропола Монтевидео. На предавањето ќе присуствува и градоначалникот на Монтевидео.Во рамките на презентацијата на македонското културно наследство во јужноамериканската земја, Велков веќе одржа предавање за заштитата на културно наследство во Република Македонија. Во Националниот музеј за историја на уметноста вчера беше отворена изложба на фотографии „Свето време“, кои Велков ги снимил на повеќе културно-историски места во земјава. Изложбата ја отвори директорот на Музејот, Густаво Ферари, а уводен збор ќе даде Енрике Бадаро Надал, директор на Музејот на современата уметност во Уругвај. Презентацијата на Република Македонија и на нејзиното културно наследство и уметност во Уругвај се одржува под покровителство на локалната самоуправа и Француската алијанса во Монтевидео, Музејот на современата уметност на Уругвај во Монтевидео и нашето здружение на граѓани „Македонида“.Уругвај е една од 120-те земји што ја признаваат Македонија под уставното име.